
Дакани факултет – д.и.ф.м., дотсент Саидзода Исроил Маҳмад
Саидзода Исроил Маҳмад, доктори илмҳои физикаю математика, дотсент, 22 феврали соли 1984 дар Ҷумҳурии Тоҷикистон таваллуд шудааст. Миллаташ тоҷик буда, соҳиби маълумоти олӣ мебошад.
Соли 2008 факултети механикаю математикаи Донишгоҳи миллии Тоҷикистонро бо дипломи аъло хатм намудааст.
Фаъолияти меҳнатии худро соли 2008 ба ҳайси ассистенти кафедраи информатикаи факултети механикаю математикаи Донишгоҳи миллии Тоҷикистон оғоз намуда, дар баробари фаъолияти омӯзгорӣ, солҳои 2015-2018 ҳамчун унвонҷӯи кафедраи информатика ба корҳои илмӣ-таҳқиқотӣ машғул гардидааст.
Соли 2018 рисолаи номзадиро ҳимоя намуда, сазовори дараҷаи илмии номзади илмҳои техникӣ гардидааст. Соли 2022 ба ӯ унвони илмии дотсент дода шудааст. Соли 2026 рисолаи докториро ҳимоя намуда, сазовори дараҷаи илмии доктори илмҳои физикаю математика гардидааст.
Солҳои 2018-2020 иҷрокунандаи вазифаи мудири кафедраи информатикаи Донишгоҳи миллии Тоҷикистон ва аз соли 2020 то соли 2025 мудири ҳамин кафедра фаъолият намудааст. Аз 13 марти соли 2025 то имрӯз дар вазифаи декани факултети механикаю математикаи Донишгоҳи миллии Тоҷикистон фаъолият мекунад.
Саидзода Исроил Маҳмад муаллифи зиёда аз 20 китобу монография ва дастури таълимӣ, инчунин 185 мақолаи илмӣ мебошад. Натиҷаҳои таҳқиқоти илмии ӯ дар маҷаллаҳои тақризшавандаи Комиссияи олии аттестатсионии назди Президенти Ҷумҳурии Тоҷикистон ва нашрияҳои илмии хориҷи кишвар ба табъ расидаанд.
Самти асосии фаъолияти илмӣ-таҳқиқотии Саидзода И.М. ба коркард ва татбиқи технологияҳои иттилоотӣ, усулҳои амсиласозии математикӣ ва компютерӣ, алгоритмҳо ва воситаҳои барномавӣ ҷиҳати таҳқиқ, таҳлил ва пешгӯии равандҳои мураккаб равона гардидааст. Дар доираи ин самт масъалаҳои амсиласозии компютерии экосистемаҳои обанборҳо ва мамнуъгоҳҳо, низоми маориф ва низомҳои худкор мавриди омӯзиш қарор гирифта, усулҳои ҳисоббарорӣ ва технологияҳои иттилоотӣ барои коркарди додаҳо, арзёбии ҳолати низомҳо, гузаронидани озмоишҳои компютерӣ ва қабули қарорҳои аз ҷиҳати илмӣ асоснок истифода мешаванд.
Барои саҳми арзанда дар рушди соҳаи маориф ва илм соли 2023 бо нишони «Аълочии маориф ва илми Ҷумҳурии Тоҷикистон» ва соли 2026 бо медали «Хизмати шоиста» сарфароз гардонида шудааст.




